سه‌رۆکی شۆرای ئیسلامی شاری سنه‌ ڕایگه‌یاند:
حه‌وته‌ی فه‌رهه‌نگی کوردستان له‌ تاران به‌ڕێوه‌ ده‌چێت
سه‌رۆکی شۆرای ئیسلامی شاری سنه‌ وتی: حه‌وته‌ی فه‌رهه‌نگی کوردستان له‌ هه‌موو بوار و به‌شه‌کان و به‌ به‌شداریی هونه‌رمه‌ندانی ناودار و خاوه‌ن به‌رهه‌می ناوچه‌ له‌ داهاتووییه‌کی نێزیک له‌ تاران به‌ڕێوه‌ ده‌چێت.
به‌پێی هه‌واڵی کوردپرێس، جه‌لال شه‌ریعه‌تی ڕایگه‌یاند: له‌ پێناو بره‌وپێدان و پاراستی فه‌رهه‌نگ و هونه‌ری کوردستان و پشتیوانی له‌ هونه‌رمه‌ندانی پارێزگای کوردستان و په‌ره‌پێدانی فه‌رهه‌نگ و هونه‌ری وڵات و هه‌روه‌ها پیشان دانی توانایی هونه‌رمه‌ندان و هونه‌ره‌‌ کۆن و پڕبایه‌خه‌کانی کورد به‌ دیکه‌ی هاووڵاتیان، حه‌وته‌ی فه‌رهه‌نگی کوردستان له‌ خانووی هونه‌رمه‌ندانی تاران به‌ڕێوه‌ ده‌چێت.
شه‌ریعه‌تی زیادی کرد: حه‌وته‌ی فه‌رهه‌نگی کوردستان له‌ تاران له‌ ۲۸ی پووشپه‌ڕی ئه‌مساڵ ده‌ستپێده‌کات و تا ڕۆژی ۲ی گه‌لاوێژ درێژه‌ی ده‌بێت.
سه‌رۆکی شۆرای ئیسلامی شاری سنه‌ ڕوونیشی کرده‌وه‌: دامه‌زراندنی هاوکاری و پێوه‌ندی زیاتر له‌گه‌ڵ دیکه‌ی پێکهاته‌کان و پیشاندانی توانایی و ده‌فرایه‌تی فه‌رهه‌نگی و هونه‌ری کوردستان، له‌ پێناو به‌رزکردنه‌وه‌ی بایه‌خه‌ فه‌رهه‌نگییه‌کانی کۆمه‌ڵگا، پاراستنی داب و نه‌ریتی کۆنی ئه‌م ناوچه‌ و به‌ره‌نگاربوونه‌وه‌ له‌گه‌ڵ شه‌ڕی نه‌رم و هێرشی فه‌رهه‌نگی، وه‌ک ئامانجه‌کانی به‌ڕێوه‌بردنی ئه‌م حه‌وته‌ فه‌رهه‌نگییه‌ له‌به‌رچاو گیراوه‌.
سه‌رۆکی شۆرای ئیسلامی شاری سنه‌ له‌ کۆتاییدا ڕایگه‌یاند: پێشبینی کراوه‌ له‌ چوارچێوه‌ی به‌رنامه‌کانی حه‌وته‌ی فه‌رهه‌نگی کوردستان له‌ تاران هونه‌رمه‌ندانی بواری خۆشنووسی، نیگارکێشی، شانۆ، فیلم، وێنه‌، مۆسیقا و … به‌شدار ببن و به‌رهه‌مه‌کانی خۆیان بخه‌نه‌ڕوو و هونه‌رمه‌رندانی بواری گۆرانی و مۆسیقای کوردستان به‌ پێشکه‌ش کردنی ڕاسته‌وخۆ و هه‌روه‌ها نمایش دانی “هه‌ڵپه‌ڕکێ” و “ده‌ف ژه‌نی” به‌ شێوازی گرووپی، پارێزگای کوردستان به‌ دیکه‌ی هاووڵاتیانی ئێران ده‌ناسێنن و خستنه‌ڕووی میراتی مادی و مه‌عنه‌وه‌ی و سه‌رمایه‌دانه‌ری، پیشه‌ی ده‌ستکرد، تۆشه‌، به‌رهه‌مه‌کانی کشتوکاڵی ناوچه‌ و خۆراکی خۆماڵی له‌ دیکه‌ی به‌شه‌کانی به‌رنامه‌ی حه‌وته‌ی فه‌رهه‌نگی کوردستان ده‌بێت.
سەرچاوە : کوردپرێس

نویسنده : admin

مشاهده همه نوشته ها

نوشته های مرتبط

ارسال یک پاسخ

نام * تارنما

*